NORMANNI melius NORTMANNI quasi NORTMANNER

NORMANNI, melius NORTMaNNI, quasi NORTMANNER

populi Septentrionales. Hi, post quam Deo visum, res Ostrogothorum, Wandalorum, Longobardorum evertere, Carolô M. rerum potiente, sub finem saeculi octavi, primum innotescere coeperunt, etc. sub Regnero trium Septentrionis regnorum Domino, sedibus suis, Scandinaviâ nempe, seu Daniâ, Norvegiâ, Suediaque exciti, circa A. C. 836. provincias Christianas crudeliter devastârunt. In Galliam sub Carolo Calvo effusi, circa A. C. 845. vix pecuniâ pacem concessere: reversi mox, Normanniam incolendam acceperunt. Vide Normannia: aliâ parte Britanniae Armoricae concessione placatâ. Intra quod temporis spatium urbes, oppida, castella innumera ab iis, capta, incensa, vastata sunt. Edelvoldum Angliae Regem A. C. 847. in eas redegerunt angustias, ut Leoni IV. Papae regnum tributarium reddere cogeretur: ab Edelredo IX. proeliis victi, A. C. 866. nec contra huius successorem Alfridum feliciores. Ab horum saevitia ut tutae essent Scotiae Moniales, labra naresque sibi praesciderunt, additâ in publicis supplicationibus formulâ, A furore Normannorum, etc. Postea in Gallia, cum Rollone duce, baptizati, in Anglia quoque ab Alfrido ad religionem adacti sunt, A. C. 876. Cum illorum duce Godofredo, traditâ illi Frisiâ, et Giselâ, filiâ Lotharii elocatâ, transegit Carolus Crassus, A. C. 881. postquam a Ludovico Germaniae Rege primo ad Scaldim victi, eum ad Luneburgum gravi clade affecissent, A. C. 878. Arnulphi Imperatoris victores, A. C. 892. Carolo Simplici. contra Robertum Parisiorum Comitem fortiter adstiterunt, A. C. 922. Nec Gallia solum omnis Scotiaque illis vectigales factae: etiam Hispaniae et Italiae oras arbitratu suo adiêre, ad annum 1000. Ex illis in Neustria Normannis fuêre, qui a bello Syriaco reduces, post illustres editas operas redeuntes, magnis rebus contra Saracenos pariter Graecosque gestis, a Nicolao II. Pontifice Apuliam, Calabriam et Siciliam in feudum acceperunt, Saracenosque inde expulêre A. C. 1058. Vide Rheginonem, Aventinum, Crantzium, Grotium in primis, in Hist. Goth. Compendiô haec de illis Rogerius Hovedenus, Anglus: Audax Francia Nortmannorum militiam experta delituit. Ferox Anglia captiva succubuit, dives Apulia sortita refloruit. Hierosolyma famosa et insignis Antiochia se ei supposuit. Vide plura in Normannta.